بمناسبة موضوع هند عاكف وتصرف حسين فهمي ومحاولة التملص من الصورة في ختام مهرجان القاهرة السينمائي الدولي 
انا عندي رأي ونصيحة قد تكون مختلفة شوية..
الموضوع بيطرح أكتر من نقطة للنقاش، وخليني أقول رأيي بكل وضوح:1. التصرف بحكمة في الفعاليات:
لما أروح مهرجان أو مناسبة كبيرة بدعوة، الحل الأفضل دايما يكون التحرك في مجموعة من الأصدقاء لو أمكن، ونتصور بشكل عادي لو الفرصة سمحت. لكن فكرة إني أجيب مصور مخصوص يفضل يلاحق النجوم ويدور على فرصة للتصوير معهم، ده بيبقى تصرف غريب وممكن ما يكونش لائق.
2. النجوم وردود أفعالهم:
في الصور المرفقة بالبوست تصريحات سابقة لحسين فهمي لم تؤخذ في الاعتبار لان في مواقف مكررة مع هند عاكف من ضمنها تصريحات بتطالبة بتكريمها.. هنزيد عليه ان بعض النجوم مروا بمواقف سيئة بسبب صور اتاخدت بطرق غير ملائمة، واستخدمها البعض في نصب أو أكاذيب، زي "ده صديقي" أو "ده شريكي". ده خلق عند البعض رد فعل حاد تجاه أي صورة مع أي شخص غريب. بالنسبة لتصرف حسين فهمي، ممكن يكون له أسبابه المتعلقة بالتصريحات السابقة ، أو انه عارف حب الظهور أو حماية نفسه من مواقف مشابهة، لكن في النهاية هو حر يختار يتصور مع مين. المشكلة إننا بنركز على رد الفعل أكتر من الفعل نفسه.
3. المحتوى بدل الترند:
لو عندك وجود على السوشيال ميديا، ليه ما تركزش على تقديم محتوى يلفت نظر المنتجين والجمهور بدل ما يكون التركيز كله على الصور واللقطات؟ ده حل عملي ومفيد أكتر، خصوصا في الأيام دي. صناعة الترند من الصور والفيديوهات بقيت حاجة مستهلكة وغير مفضلة بشكل كبير.
4. الواقع في صناعة الفن:
الحصول على أدوار وشغل دلوقتي مرتبط بالمصالح والعلاقات داخل الكواليس. النظام كده، ومفيش عدالة في كل المجالات. الحل؟ اجتهد للدخول للعلاقات دي إذا أمكن، بدل ما تضيع وقتك في أمور هامشية. واقع مؤلم وحزين ولكن انا شفته كتير لان مش بسهولة إسمك يتحط علي تتر وانت قاعد في برج بعيد والكلام ده بشهوفه في الفن وفي الكتب والكُتاب..نصيحة حاول تتواجد بدل ما تقول ان غيرك سبب فشلك.. حافظ علي التوازن
5. حب الظهور:
حب الظهور بقى مشكلة كبيرة عند البعض، وده مش مقتصر على الفنانين بس. عن نفسي، حضرت فعاليات مع نجوم كبار وكل صورة أخدتها كانت بعد موافقة، وكان دايمًا في سياق طبيعي مش مجرد "جري ورا صورة وخلاص". المهم دايمًا يكون فيه احترام متبادل للطرفين.
الخلاصة:
الصورة مش كل حاجة، والمواقف دي بتخلينا نراجع تصرفاتنا كجمهور وكفنانين. الاحترام والتقدير لازم يكونوا في المقدمة، والتصرف بهدوء واتزان بيحفظ مكانة الشخص أكتر من أي صورة أو ترند.
