غضب

ملعونة البيبان الي مبتفتحش

ملعونة الحيطان الي مبنية

ملعونة الخطاوي في شوارع 

سكتها علي بابك مبتوصلش

ملعون الكلام الي مبيتقالش

ملعون ولو غيرك اليه سامع

ملعونة بسمة بعيدة مرسومة

وضحكة عاصية عنيدة مبتطلعش

وملعون كل شئ غيرك

حتي الهوا لو ما حمل طيرك 

وملعون في العروق دمي

لو ايدي طالها حضن ايد غيرك

ملعونة لحظة سيرتك فيها منسية

ملعونة ميت مرة ولو مليانة حنية

وملعون كل يوم عدي وبتنفس

غابت عنيك عني مابين الرمشة والتانية

الفطار

وسط النهار.. الشمس نار 

والروح ساكنها الانكسار

والقلب دايب انتظار

والصوت مجلجل مالوجع

يصرخ.. بيوحشني الجدع

من يوم ما راح يدور ع الفطار

هَم الولاد بقي تقل دم

والعيشة صعبه سعات تغم

سايبينها وبنجري يا عم 

علي لقمة تملي بطن عيل ويا أم 

وهدمة صيفي او بكم

ونعيش كده ترسين في لحم

طب امتي هاتكحل عشانه

واضحك وانا شايفاه فجنانه

وألبس ونتشيك ونخرج

حلبسة او ترمس وكرنيش العشا

نرجع هدومنا مكرمشه 

بس المزاج عالي وقلوبنا مفرفشة 

قنطار فلوس مطلوب ولا كافي

وان يوم مفيش تقدر تعيش حافي؟

ويعدي قطر العمر اكسبريس

والشيب يطول الراس ويكسيها

وماحد عارف قد ايه لسه الحياة فيها

وانا قلبي عشمان يوم يسمع اغانيها

انا في انتظار شمس النهار تهدي

والروح بحنية كسرتها تتجبر

والقلب يرتاح وبعد الغيبه يتصبر 

والصوت يغير نبرته ويفرح

يصرخ...واحشني يا جدع

من يوم مارحت تدور ع الفطار

نحت

تماثيل ومرصوصة علي الجدران
ألوان بتبرق للعيون وتبان
والملامح وكأن فيها الروح بتدب
والأصل جبس معدومة الحياة والقلب

عبقرية

العبقرية فالحياة انك تكون

قادر ساعات تحبها بجنون

قادر تسيبها ساعات تهون

وساعات بتستسلم عشان

فالقلب دقه حنينه..

تتلون الأيام معاها الف لون

فص العقيق

وف وسط ظلمة ليل فص العقيق يبرق

زي الصديق الزين يسند .. والحق فيه يصدق

واحنا ف زمن كداب فصه نحاس مطلي

فيه ناس لو شفتهم .. بنزين وجاي يحرق

قهوة الحبايب

علي سبرتاية عتيقة نسوي البن يعمل وش

وبين اصحاب لو انت ف ضيقة هاتفرفش

وايه نحتاج مابين طريقين سوي القهوه أوالشربات؟

وشوش سمحة وقلوب مفتوحة مهما زادت المسافات

#افتقد_قهوتي

الأسئلة

المعضلة بتكون..

لما تقابلني الأسئلة

والاجوبة ماتجيش..

ويقولوا ليه مستعجلة

وتغيب عليا الشمس يوم واتنين..

وافضل مكاني مشتكيش..

ازاي كده متحملة؟ 

عودت قلبي يحترس...

وكتير غصبته يتخرس... 

ولما فاض الكيل غضب وثار 

سألته ايه المشكلة؟ 

صرخ بصوت مجنون وقال

الانتظار فجرني زي القنبلة

وانتي تقوليلي مشكلة

فين من يومين كنا وكان

دلوقتي ع الرف القديم 

بين السطور المهملة

5اغسطس 2014

ابن قلبي

يابن قلبي يالي جيت متأخر

خليك شديد 

ده الوقت رهوان والعمر متبخر

خليك قوي

سيب الي فات عيش ولاتنزوي

خليك شجاع 

يالا ابتسم كفايانا م الاوجاع 

خليك جدع 

اوعي في عنيك يوم انخدع 

خليك جرئ

عافر وعوم..تحيا 

وان خفت يابني يوم

هاتموت غريق

خطر

قلبي علي حافة خطر

ماهو بين إيديك أصله اتعصر

من كتر قوة الاشتياق

رحت أحضنك 

قلبي إتكسر

قلبي في هواك مشدود وتر

إلعب عليه مزيكا مالي تحبها

أرقص معاك وقت السهر

وإياك تشده بالبعاد..

راح ينقطع

أصله علي القرب إتفطر

صوتك في همسه بسمعوا

وعيوني يبقوا بيلمعوا

وكلامي يتلخبط وأغلط

وحروفي تتشخبط وتفرط

فين من بحبك قد إيه

الوقت فات!

لو بس أقدر ارجعوا

رسمك علي قلبي إتوشم

وأنا دبت من كتر العشم

بفرح بكلمة تقربك

وأغضب لو الصوت اتكتم

وأفضل أعاند سكتك

مهما الطريق بينا إتقسم

تزرع شجرة

تزرع شجرة وسط الصحرا 

فجاة الرمل الاصفر يطرح خضرة

بعد شوية نقطه مية لبذرة عفية

وردة فعود مشدود 

تبقي الصحرا صحبة ورد هدية

نعمه كبيرة انك تقدر

تبدر خيرك كده من غير ماتفكر

حاوط غيرك كتر خيرك

قبل ما يبقي اللون الاصفر غيه

قرب كل ما تقدر...حاول

بدل الشجرة الواحدة هانعمل ميه

شروط الغفران

شروط الغفران  كتير 

ياتقبلها يا تستجير 

كلام خطير 

لما تختار الوجع

وقت ما يكون الاختيار

جنه كانت او في نار

القرار اسهل قوي قبل السفر

يستجير؟

لما يبعد

اغفر ازاي الوجع

الملامح الي غيرها البكا

ليل نهار معدتش تفرق

ولا عمري اللي اشتكي

اغفر ازاي الدقايق

والسعات الي جريت وقت فارق

طعم كل الحلو راح 

ممكن اغفر لو عرف يرجع لي السنين

يستجير؟

او يغير لون رتوش ابيض 

وخطين ع الجبين

او يرجع لي ابتسامة 

حتي لو جواه حزين

ممكن اغفر ايوه طبعا

لو رضي العقرب يدور بالعكس

ممكن اغفر ايوه طبعا

 لما الاقي النجمة جنب الشمس 

في يوم فات من سنين 

الغيرة

عن الغيرة دي أمرها صعب

رصاصة تصيب مكان في القلب

بتعمي سعات

وترمي سعات

ولما تزيد 

تصيب بسكات

ولما تشوفها تكشيرة

كده كملت

وصلت لآخر المقمات

لاينفع وقتها معلش

ولاهاتغش فالحكايات

دي أصل الغيرة مبترحمش

بتعمي سعات

وترمي سعات

ولما تزيد

تصيب بسكات

وآه مالقلب لما يعد دقاته

ويسمع صوت في ودنه يرن

وصورة العين بتتصورها في العتمه

وأفكار عن كلام إتقال لكن كتمه

ماهي الغيرة دي حيرة ونار

بتعمي سعات

وترمي سعات

ولما تزيد

تصيب بسكات

ولما النوم يخاصمك يوم

ولو هاتعد ليل ونجوم

ومهما تداري مفضوحة

ومهما ضحكت مجروحة 

وطول الإيد ماهيش طايلة

خيال داير وروح فايره

دي أصل الغيرة مبترحمش

بتعمي سعات

وترمي سعات

ولما تزيد

تصيب بسكات

المفيد

المفيد ان لازم اكتب النهارة شئ جديد

كلمتين عن قلب  دق بشكل تاني 

دقة صرخت غيرت كل المعاني 

لًاًنْ معاها العمر بعد ماكان صخرة حديد 

المفيد ان مش ممكن نغامر 

لما تبقي السعادة بين ايديك اكيد

اوعي حاسب ... استفيد 

حَوّط الـ فاضل منها حتي لو بعيد

المفيد ان وقت ما الدَيَّان يريد

كل شئ فـ لحظة يتغير 

والـ فات عمره وهو متحَيّر يغَيّر

والعيون الي شافت كله غامق

تفتح الشباك تشوف الوان وريشة

المفيد نرسم الاحلام معانا سطر سطر 

نلضم الايام سوا نعملها قطر 

يجري بينا لدنيا بس تخصنا

واوعدك اخر محطة تلاقي قصر

ده المفيد

الفيلسوف

كان فيلسوف وسط الظروف

شاعر قوي بكل الحروف

ساخر وساخط بس كله خوف

حَب الحياة شرخت له قلبه

أصل المحال كان غيته

فرسمها ضحكة إتداري فيها

ماهو فيلسوف

جاهو جاهين

اسمه علي اسم النبي

زاد المحبة محبتين

هو بنفسه صلاح جاهين

إسم الفوارس منه فيه

إسمه الي هو محمد صلاح الدين

سبحانه من وهبك بهائك

من حكمتك لم نرتوي

ولا نسلي رباعيات شبابك

الثورة كانت مبتغاك ونلت

بس الحقيقة

كتر الشجن جواك

 خلاك حزنت

ورحلت

أكتُب ما أكتُب فيك أنا أسوي إيه

وإنت الي الماظ حر أتباهي بيه

لكنها هي الحياة

تاخد من الجدعان أجدع جدع

ومن الفلاسفة يروح الي إبتدع

وأفضل أنا تلميذ نجيب

أقرا كلامك

وأتوجع

تخاطيف 2... ضيعة العشاق

معصومة كلمات في ضيعة العشاق

تأبي علينا خشية البوح ان يتمكن

في محرابه اتلو ترانيم الحياة

يصحوا فينطق شوقة... 

صلاة

____________________________________

راهب يخشى الخضوع لناسكة

ومكابر لشفاة تقطر حبه
ومخادع بالقول لست براغب
ومن الحنين لقبلة...
يتألم

____________________________________

كيف السبيل لعودةٍ الي جنة وخشوع

او ان صيام الدهر يغفر ذنب

مولاي صومي يوم عنك ذنوب

ولإن حللت حصار خوفك

لغفرت لي ذنب لقلب يذوب...

متظلم 

____________________________________

لا تقرأ أسفاري ان كنت تريد رحيلا

فدثار الصمت ان تود بديلا

لاتقرأ أسفاري 

فنادئي يعلوا صواري السفن 

وشراعك من ثوبي

فسيأبي الابحار بدوني دليل...

مستعصيا

تخاطيف 1...بحر العطش

بعض الماء لا يشفي العطش..

وبعض منك لا يكفي لسكون قلب اتعبة الطريق..

وبعض مني غاضب لاني ذهبت اليه وعدت دوني

فأين مني الآن منه و مني

وكيف نبدل البعض القليل 

بكل ما في البحر من  ماء

فلا عطش ولا غضب ولابقليل من كثير

ولا سفر ولا ترحال ولاغياب 

وتأتيني بأنت وما ذهب إليك مني

وألقي بالتاريخ من نافذة السماء

وأغلق الساعات بلا إستثناء

هواء ما أريد وماء من وريد

حياة فيه لا تكفي سواها ..

فهل يدري القدر انه مرتجاها

تك تك

عقرب بيتك تك

الوقت علي العمر يتك تك

وكأنه بيمشي بكعب يتك تك

متعايق انه عليك بيدوس يتَك

جسمك بردان تبقي متك تك

والقلب من الوحدة حزين بيتك تك

.............

عندي علي الحيط ساعة بلاستيك

تك وشمسي بتشرق تك تك

استني معادك واتلكك

وان غبت أمسك قلمي واتك تك

يمكن يجري الوقت ويسكت

صوت جوايا كانه الكيلاكت

.............

لوعلي بابي هاتيجي تك تك

اجري لحضن عليك يتك تك

تسمع صوت مكتوم بيتك تك

ومشاعر صوتها مدربك بتك

تاخد مفتاح والباب يتسك

وعلي كتفك اطبطب تك تك

تك تك

سكر سنترافيش

سكر سنترافيش مرشوش ع الوش 

علي عيش مخبوز ببياض التلج 

اول مايخش الفرن يكش 

لو تنسي الوقت... يتفحم 

ماهو اصل النار بتقش 

وان خفت عليه... 

يطلع لك ني ميتاكلش 

الدنيا ياصاحبي مابين الاتنين 

ان ضحكت يوم 

تاني يوم البوز والغش 

وان دقت السكر مرة 

م المر ها تيجي تحش 

لو قادر تعشق مرة متترددش 

اهو تبقي لقيت للسكر طعم 

يسندلك بس مرارة طعم المش

المنقلة

ورقة وقلم ومنقله

فكرت ارسم لم لقيت براية

اول ماخطيت القلم شخبطت

قلت امسحو مالقيتش استيكة معايا

ارسم دواير حايرة بالمنقلة

رسمت قلب ووش وغمزات

ونص دايرة وشرطتين لعيونة ضحكاية

ليلي والمجنون

عطرولي كل طرحة

زوقولي الحلم قبل النوم

حضروا لي الورد الاحمر 

وارسموا فوق العيون باللون

اكتبوا ان اسمي ليلي 

واندهوا لي بسرعه ع المجنون

رباعياتي ... صباح مرتاح

صباح ارواح خضارها الصافي بينور في عز الليل

كفوف متصالحه متواعدة تشد الحيل

صباح هادي ومش عادي لان الحلم كان صوته غني ومواويل

وشط وبحر وصبيه وحضن براح ...صباح مرتاح

تمر حنة

بأيدي لأعصر لك شراب التمرحنه

لاجل جمر الجلب بالصبر يتحني

بالعسل احليه واغطي وشه سكر

وكاس فضة واجيك بكفوفي تتوضي

رباعياتي .. فجري الجديد

فجري الجديد طالع ياخلق الله

صافية السما فيها انا شايفاه

ضحكة عيونه فرحة جنونه

وحتي لو مسجون انا مسمحاه

عصفوري

عصفور وجاني مزقزق يصحيني

بريش ناعم وعلي وشي طبطب

ومن روحي خطف ضحكة تواسيني

دي نقطة ميه للعطشان ترطب

فرد جناح الهوي وراح مخبيني

بين الضلوع اسكن وليه اهرب

نومه واكل وميه وجناحات تدفيني

مكفيني من الدنيا لاعوز غيره ولاهاطلب

شوية وراجع

شوية وراجع...تزيد المواجع... 

بعيد ولا راجع...مكانك هنا... 

واوعاك تكون مراوغ مخادع...

ولو حسيتك بتهرب وخايف.. 

خد الوقت واجري مكان مانت شايف.. 

شويه وراجع.. تزيد المواجع

كتير قلتها.. وفوتها..

زهقت انها.. مجرد مخدر

بعلم الطبيب..دواك مر غلب

وليه الدوا والمرض والجفا

فإيد واحدة منها الحياة والشفا

شويه وحبة ودقيقه وسنه

مؤكد شايفني ان انا مش هنا

متفرقش عادي ده بعد اعتيادي

متتعبش نفسك وكون مستعد

قفلت المنبه وخدت المهدئ

شوية شوية الحياة ممكنة 

رجعت انت ولا ... مفيش مشكلة

شوية وراجع ...مكانك هنا 

نني عنيك

بصيت في نني عنيك دققت قبل كده

تعرف سمار لونه وكان نونو قد كده 

مكتوب عليه اسمي ..قرب وجرب تشوف 

عارفاك ما صعب تقولوا ..خليك كده مكسوف

خايف تقرب لاتهرب من عنيك الحروف

يخرج كلام ع اللسان يكسر صخور الخوف

طب بس جرب وحاول 

مهما دارينا الحقايق وسمناها "ظروف"

وسط الجدايل خبيناها بفيونكات ع الطروف 

فوق في السما نجمات عدد سُكاتنا حروف

انا صورتي شايفاها في النني عدت طيف 

دي رموش عيونك أرضي  

وجفونها ضليلة من حر شمس الصيف

انا ساكنه فيهم من زمان 

أنا مش مجرد ضيف

صباح الغرام

واصحي ليه و انا نايمة طول الوقت مابين ايديه

قد ايه الدنيا دافية لما بتغطيني رموش عينيه 

حتي احلامي بتتغير وبحلم حلم منه او اليه 

وياسلام ع الانبساط لما بيضفرلي شعري 

حلم ايه؟... ده اكيد حقيقة

بس لو ترضي تطول كام دقيقة؟ 

الحقيقة انه احلي من كل الكلام 

حتي لو كان الغرام مجرد حلم م الأحلام

او سلام بيعدي مع بسمة شفايف

تستخبي لما بتخاف م الكلام

إن صوتك يعترف ويبوح غرام

اصحي ليه وانا نايمة طول الوقت مابين ايديه

بسمعه وبشوفه وبكلم عنيه

ياسلام ع الانبساط لما إيديه تطبطب

او ترطب قلب طاله وجع وعطب

حلم كان او حقيقة

عدي لحظة او دقيقة 

طولت او حتي فاتت بين احلام بريئة

واصحي لييه ان كان معايا 

جوة حلمي و فالحقيقة 

صباحك غرام