صباح الخير يا بنتي

صباح الخير يابنتي 

يا احلي ما في مدينتي

صباحك حتي وانتي 

ببوز كده زي مانتي 

اجمل من كل وقت

صباحي لون عيونك

وعمري خصلتين

من شعرك ع الجبين

وقلبي لما شافه

من المحبة رق

لولا الهوي الي بينا

والفرح الي مقابلنا

او حتي المشكلة

انا لاجل خاطرك انتي

كتير متحملة 

وان يوم عليت عليكي

صوتي اهو خوف عليكي

وان كان في العمر حلم

انا وانتي كل يوم

هانعيشها احلي علم

يحميكي ويراضيكي

انا بيكي احلي ام

عم صلاح ياجاهين

عم صلاح يا عم صلاح

كلمة تجلجل وسط براح

فكرة وصورة وضحكة جسورة

بس القلب ياعين ما إرتاح

ياما كتبت فرح عناوين

ورباعياتك لونها حزين

لما كلامك كان لنا دين

واما الريشة رسمت صورة

ولاموناليزا المبتسمين

بس خسارة برضوا حزين

وشك كان شمس منورة

جواك ليل ساكن مندرة

بس ايديك حته سكرة

كان ايه ده كله يا عم صلاح

فينك من زوزو واميرة

حبها كان احلي ما في السيما

وللا كلاب اللص وشوفتك

 وغرامك في الكرنك خطك

ايه فنك ده يا عم صلاح

علي اسم مصر كتبت وقولت

وتاريخها بريشتك ورسمت

لو غيرها سيادتك ماعملت

يكفي كلامها انا اصلي آمنت

الليله كبيرة قوي علينا

فتها لينا وبرضوا حزينه

رحت وسبت كلامك فينا

كان اولي وجودك وسطينا

نعمل ايه ده قرار مش لينا

ربك بعبادة الاولي

وان كنت مشيت عند المولي

صورة وحرف كتاب في ايدينا

صوتك مع سيد وعلي

اقرب لما الوحشة تزيد

وكأن كلامك ده امبارح

ايوة صحيح انت اللي بعيد

بس كلامك بينّا اساس

ايه فنّك ده يا عم صلاح

عم صلاح يا جاهين ياعظيم

بعد العمر ما مر سنين

اقدر اقول لو رحت حزين

انت الفرحة الي ف وسطينا

عم صلاح يا عم صلاح

نام مرتاح

في ذكري ميلادة ال83 دامت كلماتك روح

عاطف مات

عاطف مات

اكتبوها وانشروها بكل اللغات 

عاطف مات 

راح لشغله راح لربه من سكات

عاطف مات

بس ما ماتش النهاره 

مات فلحظة دبحوه فيها بسنه باردة

عاطف مات 

لما اخوه قرر يركب عداد الساعات

......

التعاطف شاف وفاة عاطف مختشاش

اصل عاطف والي قبله راح بلاش 

دم سايح من زمان وكانه بحر

والحساب ميجيش وراه غير كل قهر

لانت عارف مين حدادي ومين يمام

كله فاكر انه حارس الارض الهمام

بس عاطف مات حرام

......

قلبي مش راضي يصالح 

لسه امه غلبانه بتبكي من الوجع 

راح الجدع 

دمه سايح لسه ولا حد ارتجع

الي راح قالك هاكتر مالفضايح

......

عاطف مات ولاّ ماتت فيه نفوسنا

ده الي مات ارتاح من خسة بشر

والي متعاطف ماتفهم

 قلبه ايه حته حجر

........

كل دم في كل ملة وكل دين 

حرموة ...جرموة ...امنعوه  

قبل ما الطوفان يشيل 

بس علي صوتك انت وهو لاجل ما يوصل لفين 

قول ورايا 

عاطف مات يا بني ادمين

في يوم الحادث الارهابي علي مديرية امن المنصورة 25/12/2013

ايام المعشقة

الساعات تقيلة والحيطان ضيقة

فين ايام شقاوتي فين التريقة

بيقولوا ايام زمان مليانه بالشقي

لو اطول منها ساعة؟

شقاوتها ياما اتزلزلت قدام

ساعات المعشقة

كانت الارض بتضحك لرنه خطوتي

والبراح مهما الحيطان ضاقت دنيتي

والهوا صيفي يشاغل قصتي

ولا احلامي وغرامي طريقي وسكتي

رجعوني وانا زي الزرع اسقيها

ادلعها والمعها واسمعها واغنيها

احننها واصالحها واراضيها

هو احنا كنا فين يا صاحبي قبليها

قالوا عقارب الساعة للخلف ماترجع

وايامنا ان راحت تفوت ولاترجع

احنا الي نقدر نقرب مال جاي خطوتين

ونخطف منها ضحكة بعمر سنين

وان كان مصيرنا الرجوع

 او ذكريات وخضوع

راح يفضل الموضوع

ساعات المعشقة

هي كاملة ولا ناقصة

هي كاملة بس ناقصة هي اصل المشكلة

من كمالها كل فرصة فيها كل الاسئلة؟

حد قال انا عرفت كل الاجوبة؟

نسعي فيها واحنا فاكرنها كده مترتبه

ناقصة سكر تفتكر؟

هي ناقصه كل مزيكتها تبقي رقصه

تبقي كاملة لما كل حلم تطولة فرصة

او تكون احلامنا جرسة 

يا الكسوف الي طايلها دي الحياة

هي ناقصة؟

كاملة كانت ولا ناقصة هي تفرق

لما فيها قلوب حزينة 

سبها تاخد اللي ليها عندنا 

واديها فرصة 

بس اوعي تنسي حقك 

هات مخالصة..هي ناقصة 

مربعاتي : صباح الرضا

هو الصباح بالشكل ده 
من فوق سمانا غيام 
وبرغم ده وصلوني فالاحلام
كلامنا سلام.. سلامنا غرام 
ايه كل ده؟ ده مفيش كده 
بالصوت وبالصورة الندا
عاجبك كده؟ طب اذا كان كده
انا احب اقول 

صباح الرضا

مربعاتي ...في السماء

ابيض فالسما طاير يا حمام
شايل علي الجناحات كلام
في المصاير كلنا قاصدين كريم
امتي نبقي كلنا رسالة سلام 

في السما الالوان سوا متنغمة
لوحة كده سبحانه ما اعلمة

مفيهاش نشاز ولا انحياز 
امتي الحياة كمان تبقي كده متلونة

أنا والورد

انا والورد اكتشفنا اننا 

شكل بعض

قد النعومة فالورق

 قد السنون فالشوك..تعض

الوان تلاته مترتبين باعتناء

وكانه عارف اني مالالوان متمكنة

انا والورد نمنا في حضن بعض

كل الكلام حكيناه وفتنلي

علي الاسرار وع الافكار وسَلّمني

مفتاح جديد.. افتح بيبان الحياة وياه

في وردة قالت لي ازاي ندهت عليه

خلت ورقها لامع كده يشاغل عنيه

علشان تلاقي سكه تيجي عندي

خسارة زعلانه انها مالمست ايديه

في ورده حمرا لونها كانه من دمي

ريحتها هاله من بعيد وانا كأني

زرعاها من ميت سنه

 سقياها من نني 

وادي ورده بيضا صافيا لون قلب صافي

طبطب ورطب وحايل قالي ماتخافي 

الورد لو ابيض ينور ليل 

وقد ايه الابيض خلي الهوا دافي 

البمبي فارد قلوعه مالورق 

فرحان لانه في جماله ماتخلق 

حتي الي كان نايم صحي مفتح 

في احلي من كده ايه 

يادوب بادية الحياة تفرح

الورد حلم جميل احلموه لازم

حتي لو ماشتروه انتوا هاتوه لازم 

لغة الورود اشعارها 

لو خطناها فالورق نكتب بيها ملازم

غنوة مني

حته منك حته مني 

احلي من اجمل تمني 

حته علشانك تغني 

حته بيك مش غصب عني 

حته مني او كأني 

اتقسمت اتنين لأني 

قبل منك ولا كأني 

بيك كده انا احلي مني 

حته بيني وبيني مني 

فيها حلمك جه حاضني

لما قلت ان انتي مني 

تفتكر ايه يكون فتني

غيرك انت يالي مني

........................

غنوتك بكتبها 

حرف منها وحرف مني

سكتك بمشيها 

خطوة منك خطوة مني 

حلم احلامي فاضلي 

احلمك طول مانت مني

....................

وردة شاردة

وردة شاردة ومال العود
من المجهود
تعافر وسط ريح باردة
ياوجع العود
وحيد خايف لايجي اليوم
ولا يقدر يعيش مشدود

مخبيين الميه في الصناديق
ماتروي
يادوب من نقطتين فالسما تروي
وبالقطارة بيعدي النفس
يجري

جنينه ايه دي فيها الارض بور
 وكوخ جنايني باين
 من بعيد مهجور
ده حتي الاسم زور

ياهل الزروع لما تنوا تزرعوا جنينة
ياتسقوا الورد لجل ما يبقي زينة
ياتمشوا وتسيبوا الجناين
للي ع الورد قادر يصونة
ولا يهينه

زي زمان

الشتا خرج الهدوم م الدولاب 

ده جوانتي ده جاكت وده شراب 

ولا تقل دم الايس كاب 

بطانية واللحاف ده عذاب

نعمل ايه ده كله م البرد العجاب

كان زمان ع الصجات ندفي ونشوي

البطاطا والذرة

ابو فروة كان لوحدة مشكلة

ولا اكل اللب تحت البطانية

احنا والاصحاب وابله سنيه

انتوا فاكرين الكلام ده هزار 

اسالوا امي تقولك كله صار

كانوا كل الناس قريبين 

علي صحن واحد كلهم ملمومين 

القلوب علي بعضها 

وقت كل شديد سوا متوحدين

الدفا كان يميز ايام الشتا

احلي من ايام زمان الملفته

ان احنا لسه جوه قلوبنا خير  

بس نفتح له الطريق هايطير

واحنا نرجع احسن من زمان بكتير

جرافيتي

ع الحيطان كتبنا كل الكلام
ابيض واسود ولا الوان اترسم
كل الوشوش الي راحت عدم
والكل موهوم انه حمامه سلام
انسان وعاوز يعيش واخوة رافض
والدم فالحالتين فصيل واحد
اهل العلوم غلبت من التفسير
والكل ماشي مالالم مستجير
لا الاخ سامح يسامح اخوه 
ولاغير رب العباد قادر علي التدبير

ذاكرة السمكة

مسكت سمكة ملونه اعاتبها
قلتلها مالك مكان يحفظ مالحياة تجاربها
عقلك مفيش ذكرى تعيش جواة... حسدتك
ماهو دة الي العمر اعيش احلم واتمناة
في الميه سهله الحياه مفهاش وشوش
فيها القوي والضعيف وفيها وحوش
الكل ليه لون وشكل وش
الا هنا موجوعين بكتر الغش
الوش طيب والحقيقه مليون وحش
اقله في البحر باين سنانه 
معلوم وواضح وعارفين مكانه
اوعدنا اما بألوان السمك
او ذاكرة تنسي وما تتذكرك

سؤال

كروان فالسما غني نده اسمي
رفعت عيني فوق لقيته باصص لي 
ليه من بعيد الندا وليه اسمي؟
فرد جناحه وطار بعيد 
وساب لي سؤالي فارسني

انسان فشوش

غريب حالك كده يا حضرة الانسان 
ماتشد حيلك غير علي ضعيف غلبان 
وريش منفوش كانه طاووس 
ولو هانشوف الاصل يطلع ابو قردان 
ساعة وجع واحدة تجيبك ارض
تطير عقل وتسمر ايديك م البرد 
تخلي الريش يطير وينكشفك ضعفك 
وممكن تمشي وفلحظة تكون ولا حد

في البعيد

الكلام مش راضي يسَّطَر في فكري
هربان بعيد ومش راضي يصادفني
ايه العمل لما أحاول اكتب ويخاصمني
حد عندة كلمتين وانا ابدا غصب عني؟ 

في البعيد كتير يبقي الكلام موجود
هي طله يادوب اكتب واخط واجود
مربعاتي البيضا ع الشاشات ورورد
والمفاتيح نغمها يصبح كنغم العود

كل حاجه في البعيد متوفقه 
متستفه ولايقه وكمان متزوقة
حته من حته ياسبحانه كده متخلقة
زي كل بعيد اكيد مستنين لحظة لقا 

قلمي الحر

قُلت القلم عاصي قالي عرفت السر 

رديت وقلت مايعصي ده انا يبني قلمي حر 

اكتبلك ع الشوارع والرصيف واكتبلك في السماء 

عن عصفورين زقزقوا هايصين بكتر الغني 

واكتبلك ع الشجر عن القلوب الحجر 

عن ضحكة احبها ده انا ممكن اكتب ع المطر

اكتب عن كل حاجة واي حاجة وكل شئ

انا ياما كنت باكتب وانا ماشية ع الطريق 

طول ما القلوب عمرانه سهل الكلام يطلع

وان عشنا حبه حزاني عادي وايه يمنع

هي الحياة كلها خطوة ويادوب ماشيين

واهي كل حاجه لاصلها هي كمان ترجع 

علي الهامش

الهوامش طرف صفحة او في جنب من الكتاب 

او ممر بين شوارع او في حارة جنب باب 

حته من قصر الامير نازله كده سرداب 

كل حاجه ليها هامش حتي شماعة الدولاب 

بص انا اصلا حياتي فالهوامش كلها 

لكن احلف كل خطوة منها فيها اخترتها 

الهوامش ضله ممكن تستخبي تحتها 

انت ساكن فيها شايف حلوها علي مرها

شايف كل شئ والاختيار في ايديك 

حتي لو محتار اكيد الي راح مش ليك 

المهم انك مفسر كل معني حواليك 

او مخطط كل صفحه من كتاب معاليك 

الهوامش فيها تسمع صوت انين

لما نِفسك يبقي اسمك للورق عناوين 

يعني تخرج تملي من الصفح ملايين 

بس لو نعرف ياصاحبي الهوامش ملك مين؟ 

ياهوامش يرضي مين

هي عيشه محرومين 

طب يومين ..؟

صوتك مطر

صوتك ده ولا كان صوت المطر؟ 
معقول كده انا اصلي حسيت بالخطر 
مع نقطة عدت ع الجبين 
مع كلمتين كانوا حيرانين 
الميه تغسل قلب كان زي الحجر
اصل المطر يقدر والرمل راح يطرح شجر 

وسط الكلام بدل النقط كانت الحروف 
تخلق حياة فالصحرا تتحدي الظروف
تضحك وتتبسم نقطة المية 
وهي شايفة الارض طارحة من غير خوف

صوتك وصوت المطر واحد ميفترقوش 
الاتنين دوا للعطش بلسم مداوي 
صوتك وصوت المطر لوحة من غير رتوش 
ترسم حوالين الغيام شمس الشموس 

ازاي ياناس ممكن نداري الفرح ونخبية 
نبعد عيون الناس عنه ونصونه 
ده كل المطر الي زارنا من قبليه 
لا زرع جاب لينا ولا خدنا علي لونه 

وتحسدونا ليه ماحليتنا شئ غير نقطتين 
الباقي لاعارف ولاعارفين
ولا قادرين عليه ولا نكونه

مربعاتي .. الواني

لو الحياة الوان اخترت الواني 
ازرق بلون النيل اخضر يابستاني..
احمر ياغيرة ونار اسود ياسجّاني..
يفضل لي لون ابيض بياض القلوب
عنواني ومكاني

دعاء المطر 2

صباحي البارد شمس تستقر خلف السحب 
هدوء يفتح لصوت الرياح باب 
وانا في انتطار المطر.. هل تمطري؟ 
في تلك البلدة المتربة افتقد المطر 
هل تمطري يا عزيزتي امنحينا واقطري 
هل تباغتينا من قطرات العمر 
عاص هذا المطر سنوات طوال 
ونحن في شعف ننتظر 
امنحينا ما يرطب القلوب لاتبخلي
فالاراض في بلدتي قفر حجر قاسية
طالت فيها الدروب ولن تذوب 
افصحي عن ماؤك اطرحيه يطرح فالارض بذرا
اخرجينا نلهو صغارا من ضجر الخمول
هذا المطر للروح غذاء والعقول
ذكريات بين قطرات ثقال تاتي من بعيد 
اين من دفء اليدين في راحتيه استزيد
اين من معطف عطرة في كل نسيج
هذا ما ياتيني مع المطر 
فاسمعي مني رجاء يا سمائي واطربيني 
ان غاب عني في السنوات العجاف 
اما ان الاوان لتغرقيني..اغدقيني 
هل من جديد؟ 
ها انا منك واليك دعاء المطر. 

مربعاتي ...دعاء المطر 1

شفتوا السما سمعت دعاء مني
جاي المطر غضبان اوعي يكون مني
انا بس دعوه ودعيت منك مايحرمني 
ماهو بعد صبر سنين مطرك مجنني

ومن ورا شباكي شايفاكي 
وسمعاكي قلتي رد دعاكي 
ورق القلب وسمايا بتتباكي 
وبدموعك علي غيابك مسمحاكي

مربعاتي ..برد صيفي

حر صيف لا خريف... هو ايه؟ 
هو احساسي وانا بتدفي فيه
برد ايه؟ هو جنبه ممكن يبقي برد ليه؟ 
لما بيقرب بتتغير حرارة ترمومترات الحياة
الهوا فرحان بيرقص جنبه في كل اتجاه 

بردانين! غلطانين.. عَدْو من جنبيه وشوفوا
كل برد هايختفي في سلام كفوفه
والربيع مستخبي فنسمه من رمشة رموشو
حرصيف! لا ده عَدّي من هنا وكان ضيف خفيف 
حر صيف جنبو حتي لو قاعدين يا سيدي... ع الرصيف

صباحك براح

صباحي ف براحك... براحك صباح 
ينور ويضوي...... يداوي الجراح
صباح من زمان....وماليان امان 
صباح لو لغيري...ياطيري وصغيري
هواه جاي يجري...ويفتح لي صدري
احس بوجود الامل.... هواه فيه حياة
نسايم بتلمس خدودي...ترطب لي عودي
ونقطه ندي ع الايد.....بتخلق حياة من جديد 
ولو ليك صباح من بعيد...افتح له اول وريد
هايسري جوة القلب نور.... صباحك سعيد

15/11/2013

مربعاتي....مفتاح وقدر

مفتاح وضايع..وجزمة وبضايع..
وغنوة وصورة وكلمة وندا 
ولهفة وقهوة ...وانتظار وخطر  
ولسة المطر لما يوصل هاكون 
علي سكة سفر..ذكريات وقدر

مربعاتي ...مدد

يعدي الفجر من عندي يصبحني
يوشوش ودني ويحاول يصحصحني
ينور لي مكان سجدة تريحني
يهل هواه بريحة وردة تفرحني
ويهديني الكلام في سطور
مابين العتمة شق السما خطوط من نور
دعوتنا تخرج مالقلوب متعلقة فعصفور
ياعالم بالخلايق مابين فرحان ومتضايق
علي باب المدد متعشمين في بال رايق

17/11/2013

احلموا

هات القلم والورقة افتح صفحتك
اكتب بداية جديدة وارسم خطوتك
ابدا في اي مكان وفي كل وقت 
اطلع لفوق واوعاك تبص لتحت
طول مالامل موجود تقدر تعافر
ابدا طريقك بخطوة ممكن تسافر
توصل لابعد طموح مفتوح لحلمك
تلمس نجوم السما والكون يضمك
حلمك ده حريتك.. غنوتك ضحكتك
اثبت وامسك لجامك وكمل سكتك
متسيبش حد يوقفك ولا يحبطك

حلمك ده حق ما حد يقدر يمنعوا
احلم بصوت مسموع لحد مايسمعوا
حافظ علي روحك وانسانيتك 
احلم ياصاحبي خلي حلمك غايتك
احلم وحلمك بكرة يكتب قصتك.



18/11/2013

مربعاتي....شتا

ياصبح برد الشتا هالل بتقلة 

الشمس غايبه والهوا غضبان 

افتح عيوني لاجل اشوف شكله

القي عيونه مرسومين ع الحيطان

يالي الدفا منك وبيك وحواليك

ابعت لي في كفك حفنه دفا وحنان

تكسر لبرد الارض شوكها 

وتخلي كل شئ فالحياة الوان 

صباح الخير

18/11/2013

حالي

الكلمتين هربانين مني... 
صباح الخير تجنني 
لاراضيه تبتسم بهدوء.... 
ولا تنسي وتحايلني
بسيطه هي سهله كده..
ياما خصام ياما رضا.. 
وناس رايحين وناس راجعين
وناس صابرين وناس راضيين
وناس واقفين كتير فطريق
مشاركين غيرنا نفس الريق
كأن مكانا مش سايع 
صحيح ما الغير جايز بايع 
ونعمل ايه دي مش بالايد
والاختيار ده بالتحديد 
ماحد بيقوي يتحكم 
ولازم يجي صبح جديد

19/11/2013

انتظار

علي رصيف المطر 
واقفين وحاسين بالخطر 
اصعب قرار ممكن تفكر فيه 
هاتعدي ولا تفضل قد ايه
كل الحكاية كلمة تخرج ع اللسان 
ترسم حوالين القدر عنوان 
ياتكمل انتظارك عالرصيف 
ياتعدي وانت مش مستني حد

18/11/2013

طعم العسل

الورد ابيض والخدود وردي 
طعم العسل والايدين حاضنين
حلم كأنة يادوب علي قدي

ابتسامة كانت غايبة سنين 
عيون جريئة حالفة ماتهدي
وعيون بريئة فيها طهر وانين

ولمسه ع الجبين
واتنين مشتاقين
شفتهم قدامي متواعدين 

فجر كان ولا ليل او نهار
مفيهاش خيال او هزار
دول منقوشين عالجدار
اسمهم وكانه شعر 
واخدين شبه من بعضهم 
يابختهم مين قدهم

23/11/2013