الحق مع الاحلام خد صورة
تفضل ملامح ذكري محفورة
ان راحت الاحلام تقدر تشوف منها 
وان حلمك اتحقق ملكت الاصل والصورة

10/9/2013

ولسه بكره تطلع شمسه تتغندر
وتتعايق ووتتمايل وتتمنظر
وتبعتلي شعاع يمسح علي خدي
يقولي اكيد في فرح هايعدي
تنور شمسي تتبسم في يوم وردي

غضب

ملعونة البيبان الي مبتفتحش

ملعونة الحيطان الي مبنية

ملعونة الخطاوي في شوارع 

سكتها علي بابك مبتوصلش

ملعون الكلام الي مبيتقالش

ملعون ولو غيرك اليه سامع

ملعونة بسمة بعيدة مرسومة

وضحكة عاصية عنيدة مبتطلعش

وملعون كل شئ غيرك

حتي الهوا لو ما حمل طيرك 

وملعون في العروق دمي

لو ايدي طالها حضن ايد غيرك

ملعونة لحظة سيرتك فيها منسية

ملعونة ميت مرة ولو مليانة حنية

وملعون كل يوم عدي وبتنفس

غابت عنيك عني مابين الرمشة والتانية

الفطار

وسط النهار.. الشمس نار 

والروح ساكنها الانكسار

والقلب دايب انتظار

والصوت مجلجل مالوجع

يصرخ.. بيوحشني الجدع

من يوم ما راح يدور ع الفطار

هَم الولاد بقي تقل دم

والعيشة صعبه سعات تغم

سايبينها وبنجري يا عم 

علي لقمة تملي بطن عيل ويا أم 

وهدمة صيفي او بكم

ونعيش كده ترسين في لحم

طب امتي هاتكحل عشانه

واضحك وانا شايفاه فجنانه

وألبس ونتشيك ونخرج

حلبسة او ترمس وكرنيش العشا

نرجع هدومنا مكرمشه 

بس المزاج عالي وقلوبنا مفرفشة 

قنطار فلوس مطلوب ولا كافي

وان يوم مفيش تقدر تعيش حافي؟

ويعدي قطر العمر اكسبريس

والشيب يطول الراس ويكسيها

وماحد عارف قد ايه لسه الحياة فيها

وانا قلبي عشمان يوم يسمع اغانيها

انا في انتظار شمس النهار تهدي

والروح بحنية كسرتها تتجبر

والقلب يرتاح وبعد الغيبه يتصبر 

والصوت يغير نبرته ويفرح

يصرخ...واحشني يا جدع

من يوم مارحت تدور ع الفطار

نحت

تماثيل ومرصوصة علي الجدران
ألوان بتبرق للعيون وتبان
والملامح وكأن فيها الروح بتدب
والأصل جبس معدومة الحياة والقلب

عبقرية

العبقرية فالحياة انك تكون

قادر ساعات تحبها بجنون

قادر تسيبها ساعات تهون

وساعات بتستسلم عشان

فالقلب دقه حنينه..

تتلون الأيام معاها الف لون

فص العقيق

وف وسط ظلمة ليل فص العقيق يبرق

زي الصديق الزين يسند .. والحق فيه يصدق

واحنا ف زمن كداب فصه نحاس مطلي

فيه ناس لو شفتهم .. بنزين وجاي يحرق